​ PlayPals

Mae prosiect PlayPals yn cynnig rhaglen 6 wythnos sy’n cefnogi plant i ymgymryd â rolau a chyfrifoldebau newydd, gan addysgu drwy theori chwarae, ac ymdrin â phwnc newydd bob wythnos.

Mae’r prosiect yn ymchwilio i theori rhannau rhydd, yn archwilio buddion chwarae, chwarae trwy gyfrwng y Gymraeg a chwarae cynhwysol. Mae llawer o’r pynciau hyn eisoes wedi eu hymgorffori i gwricwlwm yr ysgol, a gall y prosiect alluogi ysgolion i gyrraedd eu targedau, fel Cymraeg Campus.

Dros 6 wythnos, bydd plant yn cymryd rhan mewn gemau a gweithgareddau perthnasol, yn ogystal â chwblhau eu Llyfr Gwaith PlayPals eu hunain, a fydd yn eu helpu i ddeall elfennau damcaniaethol ym myd chwarae a pham mae’n bwysig. Nod PlayPals yw galluogi’r plant i ddod yn llysgenhadon dros chwarae drwy ddefnyddio’r sgiliau y maent wedi eu dysgu i addysgu plant iau yn ystod amser chwarae yn yr ysgol.

I orffen y prosiect, bydd pob plentyn yn derbyn tystysgrif a bathodyn PlayPals y gall ei wisgo yn yr ysgol fel arwydd o gydnabyddiaeth a chyflawniad. Gobeithiwn feithrin hyder, gwella lles meddyliol a datblygu perthnasoedd cadarnhaol, a chael hwyl yr un pryd!

Cost y prosiect 6 wythnos yw £400.00.

​ Cynnydd Chwareus

Mae Cynnydd Chwareus yn darparu dewis o naill ai chwarae rhannau rhydd neu ddisgo distaw. Mae’r ddau weithgaredd yn darparu elfen addysgol yn ogystal â chefnogi lles drwy chwarae.

Mae gweithgaredd rhannau rhydd yn sesiwn bwrpasol lle gall ysgolion ddewis pwnc y mae’r plant yn ei ddysgu yn y dosbarth, a bydd y tîm chwarae’n helpu i gyflwyno hynny drwy rannau rhydd. Er enghraifft, rydym wedi cael themâu fel yr Ail Ryfel Byd, Gwytnwch, Cymunedau, Dyfeisiadau, Oes Fictoria, y Jyngl, ac ati. Mae hyn wedi galluogi plant i ddysgu am y pynciau hyn, ond hefyd i sianelu eu dychymyg i greu rhywbeth o’r adnoddau a ddarperir.

Mae’r disgo distaw yn ffordd hwyliog o wneud rhywfaint o waith Rhifedd, Llythrennedd a Daearyddiaeth trwy gemau bach gan ddefnyddio cerddoriaeth. Mewn sesiwn awr mae’r plant yn canu ac yn dawnsio i ganeuon adnabyddus, gan brofi eu sgiliau Mathemateg, creadigrwydd a’u gwybodaeth Ddaearyddol drwy gerddoriaeth. Daw’r sesiwn i ben gyda chwis ar gerddoriaeth ffilmiau, sydd bob tro’n boblogaidd.

Nod Cynnydd Chwareus yw ychwanegu elfennau chwareus i bynciau a gweithgareddau addysgol, gan gael hwyl drwy chwarae. Mae’n ffordd effeithiol o feithrin hyder, datblygu sgiliau gweithio mewn tîm, caniatáu i greadigrwydd a dychymyg ffynnu mewn amgylchedd diogel a chwareus.

Rydym yn cynnig sesiynau untro am ddim gyda’r dewis i dalu am sesiynau ychwanegol ar gost o £45.00.

​ Amser Cinio Rhydd

Mae’r ddarpariaeth amser cinio hon yn galluogi plant i ddefnyddio rhannau rhydd i wella eu hamser chwarae yn yr ysgol.

Mae ein staff yn cyrraedd yr ysgol gyda fan yn llawn o adnoddau, ac maent yn hwyluso’r chwarae fel bo’r angen. Prif nod y prosiect hwn yw cyfoethogi’r amgylchedd chwarae yn yr ysgol, gan roi mwy o gyfleoedd chwarae i blant gydag amrywiaeth o adnoddau. Mae hefyd yn eirioli dros hawl plant i chwarae ac yn addysgu am bwysigrwydd chwarae o safbwynt yr ysgol.

Ar hyn o bryd rydym yn cynnig 5 sesiwn am ddim i ysgolion, a dadansoddir hyn wedyn i symud ymlaen i sesiynau y telir amdanynt.

​ Hyrwyddwyr Eco

Mae hon yn rhaglen 5 wythnos ar gyfer plant Blwyddyn 6 i’w haddysgu am 5 maes allweddol, sef Bioamrywiaeth, Ynni, Cynaliadwyedd, Newid Hinsawdd ac Asesiad Amgylcheddol. 

Mae’r sesiynau hefyd yn arwain yn daclus i ysgolion gynnal eu gwaith carbon a bioamrywiaeth eu hunain gan ddefnyddio cyfrifiannell carbon drwy gwblhau’r asesiad amgylcheddol yn y sesiwn olaf. 

​ Hwyl gyda Ffoneg

Mae Hwyl gyda Ffoneg yn brosiect difyr wedi ei gynllunio ar gyfer plant oedran meithrin a’u rhieni, ac mae’n defnyddio gweithgareddau rhyngweithiol, chwareus, i ddatblygu sgiliau llythrennedd cynnar a hyder mewn ffoneg.

Fe’i darperir dros dair wythnos.

​ Lles Chwarae

Nod Lles Chwarae yw ei fod yn ymyrraeth strwythuredig yn yr ysgol sy’n defnyddio chwarae fel offeryn i wella gwytnwch, cefnogi rheoleiddio emosiynol, gwella sgiliau cymdeithasol, a hybu lles cyffredinol.

Bwriedir iddo gael ei ymgorffori o fewn yr ysgol, gan gefnogi datblygiad unigol a grŵp.

​ Archwilwyr Chwarae

Prosiect byw yn y gwyllt sy’n caniatáu i blant archwilio sgiliau newydd yn yr awyr agored.

Mae’r gweithgareddau’n amrywio o adeiladu cuddfan, cynnau tân, hamogau a chrefftau eraill yr awyr agored. Mae’r prosiect hwn hefyd yn cefnogi plant i ddatblygu gwytnwch a gwella eu lles.