Mae Deddf Llywodraeth Leol ac Etholiadau (Cymru) 2021 yn gosod dyletswydd ar gynghorau i gynnal Asesiad Perfformiad Panel unwaith o fewn cylch etholiadol. Daeth y ddyletswydd i rym ym mis Mai 2022.

Roedd yr Asesiad Perfformiad Panel yn edrych yn benodol ar i ba raddau y mae’r Cyngor:

• Yn gweithredu ei swyddogaethau’n effeithiol.
• Yn defnyddio ei adnoddau’n economaidd, yn effeithlon ac yn effeithiol, a
• Gyda threfniadau llywodraethu cadarn ar waith ar gyfer sicrhau’r uchod.

Comisiynwyd CLlLC i gydlynu a hwyluso’r Asesiad Perfformiad Panel (APP) ar ran yr holl gynghorau.   Cynhaliwyd yr Asesiad Perfformiad Panel ar gyfer Sir y Fflint rhwng 25 a 28 Tachwedd 2025. Yn ystod yr wythnos, treuliodd y Panel tua 240 awr yn cyfarfod ag unigolion a grwpiau ffocws, gan gynnwys Aelodau, Prif Swyddogion, Rheolwyr Gwasanaeth allweddol a budd-ddeiliaid mewnol ac allanol. 

Derbyniwyd adborth cadarnhaol gan y Panel. Fe wnaethant gadarnhau fod y Cyngor ar hyn o bryd yn bodloni ei ofynion perfformiad statudol a’i fod: 

• Yn gweithredu ei swyddogaethau’n effeithiol. 
• Yn defnyddio ei adnoddau’n economaidd, yn effeithlon ac yn effeithiol, a 
• Gyda threfniadau llywodraethu effeithiol ar waith ar gyfer sicrhau’r uchod. 

Dywedodd y Panel: 

• Mae’r asesiad hwn yn un cadarnhaol oherwydd, er bod modd elwa o weithlu ymroddedig a phartneriaethau allanol cadarn ar draws y sector cyhoeddus, y sector preifat a’r sector gwirfoddol, mae’r Cyngor yn wynebu risgiau sylweddol o ran ei gynaliadwyedd ariannol yn y tymor canolig. 
• Mae’r prif naratif corfforaethol yn ddibyniaeth allanol, a briodolir bron yn gyfan gwbl i'r Setliad Llywodraeth Leol. Er bod pwysau ariannol enbyd yn cael eu cydnabod ar draws y sector, mae dibyniaeth y Cyngor ar y naratif hwn yn bwrw cysgod dros yr angen brys i sicrhau trawsnewid strategol mewnol. 
• Er bod y Cyngor ar hyn o bryd yn bodloni ei ofynion perfformiad, mae'n wynebu risgiau critigol o ran gwydnwch ariannol, rhaglen drawsnewid y mae angen cychwyn arni a rhoi hwb iddi ar frys a diwylliant gwleidyddol dan straen sy'n cymryd cyfran anghymesur o gapasiti Aelodau a Swyddogion, yn enwedig o ran y trefniadau craffu. 

O fewn yr adroddiad APP, mae’r Panel hefyd yn nodi argymhellion ar gyfer cefnogi Sir y Fflint gyda rhoi sylw i’r canfyddiadau hyn.  Mae Cynllun Gweithredu wedi cael ei lunio a’i gytuno er mwyn rhoi sylw i’r argymhellion hyn, ac adroddir yn rheolaidd ar berfformiad yn erbyn y camau gweithredu hyn.