Newyddion Diweddaraf Cyngor Sir Y Fflint

Gwahodd busnesau yn Sir y Fflint i ymgeisio am hyd at £50,000 i wella eiddo yng nghanol y dref

Published: 02/04/2026

Gall busnesau mewn canol trefi ledled Sir y Fflint ymgeisio am grantiau rhwng £5,000 a £50,000 i wella eu hadeiladau drwy gynllun newydd Cyngor Sir y Fflint.

Gwahoddir ceisiadau’n awr i’r cynllun Grantiau Gwella Eiddo Canol y Dref gan berchnogion a thenantiaid busnesau masnachol ym Mwcle, Cei Connah, Y Flint, Treffynnon, Yr Wyddgrug, Queensferry, Saltney a Shotton.

Ariennir y cynllun drwy Gronfa Effaith Balchder Bro Llywodraeth y Deyrnas Unedig ac mae’n medru helpu ag amrywiaeth helaeth o waith cyfalaf i wella adeiladau, gan gynnwys adnewyddu blaenau siopau, gosod arwyddion newydd, atgyweirio strwythurau a hybu effeithlonrwydd ynni – gan gyfrannu at wneud strydoedd mawr Sir y Fflint yn fwy deniadol, lleihau nifer yr unedau gwag a chreu cyfleoedd newydd i fusnesau.

Mae angen dilyn dau gam i wneud cais am grant. Yn gyntaf, mae ymgeiswyr yn cyflwyno Datganiad o Ddiddordeb byr a gaiff ei asesu yn ôl ei gymhwyster a’i addasrwydd yn strategol. Wedyn, gwahoddir ymgeiswyr llwyddiannus i gyflwyno cais llawn a gaiff ei asesu gan Banel Adfywio’r Cyngor.

Mae’r grantiau’n talu hyd at 70 y cant o gostau cymwys y prosiect a’r ymgeiswyr yn cyfrannu o leiaf 30 y cant eu hunain. Telir y grant fel ôl-daliad pan gwblheir y gwaith a gymeradwywyd.

Mae gwaith cymwys yn cynnwys gwella blaenau siopau, ffenestri a drysau, arwyddion, goleuadau allanol, toeau, offer dwr glaw, rendro a gwaith cerrig, yn ogystal ag atgyweirio strwythurau. Gallai gwaith mewnol fod yn gymwys hefyd fel rhan o becyn cynhwysfawr o welliannau allanol neu newid y ffordd y defnyddir adeilad.

Mae’n rhaid bod ymgeiswyr yn berchnogion neu lesddeiliaid eiddo masnachol gydag o leiaf tair blynedd yn weddill ar y brydles. Mae’r cynllun yn agored i fusnesau annibynnol, mentrau bach a chanolig, mentrau cymdeithasol, elusennau a mudiadau cymunedol. Nid yw eiddo preswyl yn gymwys.

Dylai perchnogion a thenantiaid busnesau ac eiddo sydd â diddordeb mewn ymgeisio fynd i dudalen y Cynllun Grantiau Gwella Eiddo Canol y Dref ar wefan Cyngor Sir y Fflint a llenwi ffurflen Datganiad o Ddiddordeb. Mae’r Tîm Adfywio ar gael hefyd i drafod cymhwyster a chynnig cefnogaeth cyn ichi wneud cais.

I gael mwy o wybodaeth, ewch i: www.siryfflint.gov.uk/GGECD neu cysylltwch â’r Tîm Adfywio ar regeneration@flintshire.gov.uk.

Meddai David Fitzsimon, Prif Swyddog Lleoedd a Thwf, “Rydym wrth ein bodd yn gallu darparu Cynllun Grant Gwella Eiddo Canol y Dref ledled Sir y Fflint o fis Ebrill 2026 ymlaen, gyda chyllid o Gronfa Effaith Balchder Bro.

“Yn y tair blynedd diwethaf, mae 43 o unedau wedi’u gwella ac mae’n amlwg fod galw mawr am y cynllun yn 2026, gyda nifer o fusnesau wedi holi’n barod.

“Edrychwn ymlaen at ddal i gydweithio â pherchnogion a thenantiaid eiddo masnachol i wella eu heiddo, hybu cynaladwyedd a thwf eu busnesau a chyfrannu at y bwrlwm ynghanol ein trefi.”