Newyddion Diweddaraf Cyngor Sir Y Fflint

Dyn wedi'i ddedfrydu yn y llys am ymosod ar swyddog y Cyngor

Published: 27/03/2026

Mae dyn a ymosododd ar swyddog Cyngor Sir y Fflint a oedd yn cyflawni ei ddyletswyddau wedi cael ei ddedfrydu yn y llys.

Digwyddodd hyn ym mis Awst 2025, pan aeth swyddog o'r Cyngor i gyfeiriad ym Mynydd Isa yn gysylltiedig â Rhybudd Talu Cosb heb ei dalu am dorri rheolau parcio.

Wrth siarad â'r preswylydd y tu allan i'r eiddo, daeth aelod arall o'r aelwyd at y drws a dechrau siarad â'r swyddog mewn modd difrïol a bygythiol.

Gwaethygodd y sefyllfa wrth i'r unigolyn barhau i ddefnyddio iaith hynod o sarhaus ac wrth iddo wneud bygythiadau o drais. Wrth i'r swyddog geisio gadael yr eiddo, ymosodwyd arno.

Adroddwyd am y digwyddiad i'r heddlu a darparodd y Cyngor dystiolaeth i gefnogi'r erlyniad, gan gynnwys lluniau o gamera corff y swyddog.

Yn y llys, plediodd y diffynnydd yn euog i ymosodiad cyffredin a chafodd ddirwy o £1,100. Mae’n rhaid iddo hefyd dalu iawndal o £300.

Dywedodd Gareth Owens, Prif Swyddog Llywodraethu Cyngor Sir y Fflint: “Mae gan ein gweithwyr yr hawl i deimlo’n ddiogel a’u bod nhw’n cael eu parchu yn y gwaith. Ni ddylai neb wynebu trais am wneud eu gwaith a gwasanaethu eu cymunedau.

Mae ymosodiadau ar ein gweithlu yn gwbl annerbyniol, a byddwn ni’n cefnogi unrhyw gamau gweithredu’n llawn i sicrhau bod y rhai sy’n gyfrifol yn cael eu dwyn i gyfrif, gan gynnwys erlyn pa fo’n briodol.”