Newyddion Diweddaraf Cyngor Sir Y Fflint

Gwasanaethau gofal preswyl yn darparu cartrefi diogel a sefydlog i bobl ifanc diamddiffyn

Published: 26/03/2026

Mae cynghorwyr wedi clywed bod plant sy'n byw yng nghartrefi gofal preswyl Cyngor Sir y Fflint yn cael eu cefnogi i ffynnu mewn amgylcheddau diogel a meithringar.

Mae adroddiad a gyflwynwyd i'r Cabinet wedi nodi sut mae cartrefi yng ngofal Cyngor Sir y Fflint yn rhoi gofal o ansawdd uchel yn gyson i rai o bobl ifanc mwyaf diamddiffyn y sir.

Tynnodd yr adroddiad sylw at bwyslais cryf ar ddarparu model therapiwtig sydd wedi’i lywio gan drawma ac sy'n rhoi canlyniadau a buddion pennaf plant a phobl ifanc wrth wraidd ymarfer.

Cafodd staff yn y gwasanaeth ganmoliaeth am eu hymrwymiad i feithrin perthnasoedd llawn ffyrdd â'r plant sydd yn eu gofal, gan eu helpu nhw i deimlo'n gartrefol a’u bod nhw’n cael eu cefnogi.

Ers 2022, mae'r Cyngor wedi agor pum cartref preswyl i blant i ddiwallu anghenion lleol, lleihau lleoliadau y tu allan i'r sir, a darparu gofal o ansawdd uchel.

Mae'r cartrefi i gyd wedi cael adroddiadau arolygu cadarnhaol gan Arolygiaeth Gofal Cymru (AGC), ac wedi derbyn sgoriau 'rhagorol' a 'da'.

Dywedodd Craig Macleod, Prif Swyddog Gwasanaethau Cymdeithasol: “Mae pob plentyn yn haeddu teimlo’n ddiogel a theimlo ei fod yn cael gofal ac yn cael ei gefnogi, a dyna’n union y mae ein timau preswyl yn gweithio mor galed i ddarparu bob dydd.

“Mae cryfder y gwasanaeth hwn, sydd wedi’i adeiladu o’r gwaelod i fyny mewn cyfnod byr, yn seiliedig ar berthnasoedd y mae ein staff yn eu meithrin â phlant a phobl ifanc, gan greu sefydlogrwydd ac ymddiriedaeth sy’n eu helpu nhw i dyfu a symud ymlaen yn hyderus.”

Mae Cyngor Sir y Fflint yn adeiladu ar ei waith cadarnhaol ac yn datblygu mwy o gartrefi gofal preswyl i blant a phobl ifanc. A allai hyn fod yn yrfa i chi? I gael rhagor o wybodaeth, ewch i wefan y Cyngor.