Newyddion Diweddaraf Cyngor Sir Y Fflint
Cyngor Sir y Fflint yn llofnodi Siarter Teithio Iach
Published: 24/03/2026
Mae Cyngor Sir y Fflint wedi addo hybu dulliau mwy iach a chynaliadwy o deithio i staff a phreswylwyr trwy lofnodi Siarter Teithio Iach Gogledd Cymru.
Mae’r Siarter yn nodi cyfres o gamau ymarferol y gall sefydliadau’r sector cyhoeddus yng Nghymru eu cymryd i annog mwy o gerdded, beicio a defnyddio cludiant cyhoeddus, gan helpu i gefnogi ffyrdd o fyw mwy iach wrth leihau tagfeydd a gwella ansawdd aer.
Y Cyngor yw’r sefydliad diweddaraf yn y rhanbarth i lofnodi’r Siarter ac mae’n adeiladu ar ei waith parhaus i gefnogi a galluogi mwy o bobl i ddewis dewisiadau teithio mwy iach a gwyrdd.
Mae’r Siarter yn nodi 15 ymrwymiad i sefydliadau weithio tuag atynt dros gyfnod o ddwy flynedd, o arweinyddiaeth a chyfathrebu, i gludiant cyhoeddus, cerdded a beicio, gweithio hyblyg a cherbydau allyriadau isel iawn.
Llofnodwyd y Siarter gan Brif Weithredwr Cyngor Sir y Fflint, Neal Cockerton a’r Prif Swyddog Gwasanaethau Stryd a Chludiant, Katie Wilby.
Meddai Mr Cockerton: “Mae Siarter Teithio Iach Gogledd Cymru yn fenter sector cyhoeddus wych i wella iechyd corfforol a meddyliol, ansawdd aer lleol a chysylltedd cymunedol y Sir y Fflint.
“Mae’n alinio’n agos â blaenoriaethau’r Cyngor o ran lleihau carbon a theithio llesol, gan wella canlyniadau’r ffrydiau gwaith hynny a chydweithio â chyrff eraill y sector cyhoeddus.
“Rydym yn falch o fod yn rhan o Siarter Teithio Iach Gogledd Cymru ac yn gyffrous am yr hyn mae’n ei olygu ar gyfer dyfodol Sir y Fflint.”
Meddai’r Cynghorydd Glyn Banks, Aelod Cabinet Gwastraff a Chludiant: “Mae hyn yn ymwneud ag ymrwymiad y Cyngor i’w gwneud yn haws i bobl gynnwys arferion mwy iach yn eu bywydau bob dydd.
“Fel Cyngor, rydym am arwain trwy esiampl a chefnogi ein gweithwyr, pobl sy’n defnyddio ein gwasanaethau a holl breswylwyr Sir y Fflint i wneud y dewisiadau hynny lle bynnag bo’n bosibl.”
Gellir gweld Siarter Teithio Iach Gogledd Cymru ar teithiollesol.cymru, ac mae mwy o wybodaeth am deithio llesol, cludiant cyhoeddus a newid hinsawdd yn Sir y Fflint ar gael ar wefan y Cyngor.