Newyddion Diweddaraf Cyngor Sir Y Fflint
Datganiad i'r Wasg 'Pythefnos Gofa Maeth' Maethu Cymru
Published: 15/05/2023
Maethu Cymru yn galw ar gyflogwyr Cymru i gefnogi gofalwyr maeth
Mae Maethu Cymru yn galw ar gyflogwyr Cymru i gefnogi gofalwyr maeth
Wrth i deuluoedd ar draws y wlad frwydro yn erbyn yr argyfwng costau byw parhaus, mae Maethu Cymru yn galw ar gyflogwyr yng Nghymru i ddod yn ‘gyfeillgar i faethu’, yn y gobaith o fynd i’r afael â’r camsyniad na allwch barhau i weithio os byddwch yn dod yn ofalwr maeth.
Mae’r Pythefnos Gofal Maeth hwn (15-28 Mai), mae gwasanaethau maethu awdurdodau lleol yng Nghymru yn galw ar y gymuned fusnes ehangach i roi eu cefnogaeth a'i gwneud yn haws i'w gweithwyr gyfuno maethu a gweithio.
Yn ôl y Rhwydwaith Maethu, prif elusen faethu’r DU, mae bron i 40% o ofalwyr maeth yn cyfuno maethu â gwaith arall ac mae eu polisi ‘cyfeillgar i faethu’ yn annog cyflogwyr i ddarparu hyblygrwydd ac amser i ffwrdd i weithwyr sy’n ddarpar ofalwyr maeth ac sy’n mynd drwy’r broses ymgeisio.
Mae'r cynllun hefyd yn cefnogi gweithwyr sydd eisoes yn ofalwyr maeth, i ganiatáu amser i ffwrdd ar gyfer hyfforddiant, presenoldeb mewn paneli, i setlo plentyn newydd yn eu cartref ac i ymateb i unrhyw argyfyngau a all godi.
Gall cael cefnogaeth cyflogwr wneud y gwahaniaeth hanfodol ym mhenderfyniad cyflogai i ddod yn ofalwr maeth.
Mae Caroline Carding wedi bod yn Ofalwr Maeth gyda Maethu Cymru Sir y Fflint ers 13 mlynedd ac mae hi wedi parhau i weithio i’r Awdurdod Lleol yn ogystal â maethu ar yr un pryd. Dywedodd hi:
“Rwy’n teimlo’n lwcus i gael fy nghyflogi gan sefydliad sy’n ‘Gyfeillgar i Faethu’. Mae Cyngor Sir y Fflint yn cynnig yr hyblygrwydd i mi weithio a hefyd gyflawni fy rôl fel gofalwr maeth, rôl yr wyf wedi mwynhau ei wneud ers 13 mlynedd.
Mae Cyngor Sir y Fflint yn cynnig cymorth drwy ganiatáu 5 diwrnod ychwanegol o wyliau blynyddol i mi y gellir eu defnyddio ar gyfer hyfforddiant, gofal brys plant a dyletswyddau maethu eraill a allai godi. Mae’n gwneud cymaint o wahaniaeth.”
Dywedodd y Cynghorydd Christine Jones, Dirprwy Arweinydd y Cyngor ac Aelod Cabinet Gwasanaethau Cymdeithasol a Llesiant:
“Mae estyn allan at gyflogwyr lleol i fod yn gyfeillgar i faethu yn un o lawer o bethau rydym yn ei wneud i gefnogi ein gofalwyr maeth yn Sir y Fflint.
I gyd-fynd ag ymrwymiadau bywyd a gwaith, rydym hefyd yn cynnig cyfleoedd dysgu hyblyg i ofalwyr maeth.
Mae hyn yn golygu bod unrhyw hyfforddiant a sgiliau trosglwyddadwy o’u gweithle yn cael eu cydnabod, yn ogystal â chynnig amrywiaeth eang o gyfleoedd dysgu gwerthfawr sy’n berthnasol i’r plant y maent yn gofalu amdanynt, trwy ein fframwaith dysgu a datblygu cenedlaethol Maethu Cymru.”
Ychwanegodd Pennaeth Maethu Cymru, Alastair Cope:
“Wrth i’r angen am ofalwyr maeth barhau i dyfu, mae angen i’n cymuned yng Nghymru gamu i’r adwy.
Rydyn ni’n gwybod pan fydd plant yn aros yn gysylltiedig, yn aros yn lleol a bod ganddyn nhw rywun i’w cefnogi am y tymor hir, rydyn ni’n gweld canlyniadau gwell.
Felly, os gall cyflogwyr yng Nghymru gefnogi eu gweithwyr i ddod yn ofalwyr maeth, gall awdurdodau lleol helpu mwy o blant i gadw mewn cysylltiad â’u gwreiddiau ac yn y pen draw, eu cefnogi tuag at ddyfodol gwell.”
I ddarganfod mwy am ddod yn ofalwr maeth yn Sir y Fflint ewch i: https://maethucymru.siryfflint.gov.uk
I wybod mwy am ddod yn gyflogwr sy’n cefnogi maethu yng Nghymru, ewch i: https://maethucymru.llyw.cymru/gweithio-a-maethu/