Ymddeoliad ar sail iechyd

Os oes gennych chi o leiaf 3 mis o aelodaeth, neu os ydych chi wedi trosglwyddo hawliau pensiwn blaenorol i’r cynllun, gallech fod yn gymwys i dderbyn eich buddion heb eu cwtogi yn gynnar ar sail salwch, beth bynnag fo’ch oedran. 

Er mwyn ymddeol ar sail salwch mae’n rhaid i gynghorydd iechyd galwedigaethol annibynnol cymeradwy (na fu’n ymwneud â’ch achos chi’n flaenorol) ardystio eich bod yn analluog i barhau yn eich swydd neu unrhyw swydd gymharol gyda’ch cyflogwr. 

Gellid cynyddu eich aelodaeth yn y cynllun i wneud iawn am y ffaith eich bod chi wedi gorfod ymddeol ar sail salwch i chi droi’n 65 oed.   

Seilir ymddeoliadau ar sail salwch ar system haenau lle mae’r ychwanegiad a ddyfernir yn dibynnu ar ba mor debygol ydych chi o ymgymryd â gwaith cyflogedig cyn troi’n 65 oed. 

Diffinnir gwaith cyflogedig fel gweithio isafswm o 30 awr yr wythnos am gyfnod heb fod yn llai na 12 mis. 

Rhoir eglurhad o’r 3 haen isod:

Haen 1: Os yw Meddyg y Gronfa Bensiynau yn ardystio eich bod chi’n analluog i gyflawni eich dyletswyddau yn barhaol, ac nad oes rhagolygon rhesymol y byddwch yn ymgymryd â gwaith cyflogedig yn unman cyn i chi droi’n 65 oed, bydd y cynnydd a ddyfernir yn 100% o’ch darpar aelodaeth o ddyddiad terfynu eich cyflogaeth i 65 oed.

Enghraifft: Mae Jim yn gweithio oriau amser llawn ac mae Meddyg y Gronfa Bensiynau wedi dyfarnu statws gwaeledd iechyd haen 1 iddo.  Mae’n 45 oed ac mae ganddo 25 o flynyddoedd o aelodaeth yn y Cynllun Pensiwn Llywodraeth Leol.  Bydd ei fuddion pensiwn wedi’u seilio ar:  

• Y 25 mlynedd y mae wedi’u cronni, ac
• Yr 20 mlynedd o aelodaeth y gallai fod wedi’u cronni rhwng 45 a 65 oed. 

Felly bydd ei bensiwn salwch wedi’i seilio ar 45 mlynedd o aelodaeth yn y Cynllun Pensiwn Llywodraeth Leol. 

Haen 2: Os yw Meddyg y Gronfa Bensiynau yn ardystio eich bod chi’n annhebygol o ymgymryd â gwaith cyflogedig yn unman cyn pen 3 tair blynedd ond ei bod yn debygol y byddwch yn ymgymryd â gwaith cyn y byddwch yn 65 oed, bydd y cynnydd yn 25% o’r darpar aelodaeth o ddyddiad terfynu eich cyflogaeth i 65 oed. 

Enghraifft: Mae Natalie yn gweithio oriau amser llawn ac mae Meddyg y Gronfa Bensiynau wedi dyfarnu statws salwch haen 2 iddi.  Mae hi’n 45 oed ac mae ganddi 15 mlynedd o aelodaeth yn y Cynllun Pensiwn Llywodraeth Leol.  Bydd ei buddion pensiwn wedi’u seilio ar: 

• Y 15 mlynedd y mae hi wedi’u cronni, a
• 5 mlynedd o aelodaeth – 25% o’r aelodaeth y gallai hi fod wedi’i gronni rhwng 45 a 65 oed.  

Felly bydd ei phensiwn salwch wedi’i seilio ar 20 mlynedd o aelodaeth yn y Cynllun Pensiwn Llywodraeth Leol. 

Os buoch chi’n gweithio’n rhan amser yn ystod eich aelodaeth yn y cynllun bydd y cynnydd i’ch cyfnod gwasanaeth (os byddwch yn derbyn cynnydd) ar sail pro rata i adlewyrchu eich oriau rhan amser. 

Haen 3: Os yw Meddyg y Gronfa Bensiynau yn ardystio eich bod chi’n debygol o ymgymryd â gwaith cyflogedig cyn pen 3 blynedd, bydd eich buddion sylfaenol yn cael eu rhyddhau heb eu cynyddu a byddant yn daladwy nes y cewch waith cyflogedig neu am uchafswm o dair blynedd.  Bydd eich achos yn cael ei adolygu gan Feddyg y Gronfa ar ôl 18 mis os nad ydych chi wedi ymgymryd â gwaith cyflogedig, er mwyn asesu a yw eich cyflwr wedi gwella, dirywio neu wedi aros yr un fath.  Os yw eich cyflwr wedi dirywio yna efallai y byddwch chi’n gymwys am gynnydd haen 2.  Fodd bynnag, os bydd eich cyflwr wedi gwella bydd y taliadau pensiwn yn dod i ben ar unwaith.  Os na fu unrhyw newid yn eich cyflwr bydd y pensiwn yn cael ei dalu am 18 mis arall.